​ദോഹ: പ്രവാസികൾക്കും സന്ദർശകർക്കും ഒരുപോലെ ആവേശം പകരാൻ വൈവിധ്യമാർന്ന ജൂലൈ കലണ്ടറുമായി ഖത്തർ. രാജ്യാന്തര കായിക മാമാങ്കങ്ങൾ, കുടുംബങ്ങൾക്കായുള്ള വിനോദ പരിപാടികൾ, സാംസ്കാരിക പ്രദർശനങ്ങൾ, കുട്ടികൾക്കായുള്ള പ്രത്യേക സമ്മർ ക്യാമ്പുകൾ എന്നിവയുമായി വലിയൊരു ആഘോഷത്തിനാണ് ഈ മാസം രാജ്യം സാക്ഷ്യം വഹിക്കുന്നത്. എല്ലാ പ്രായക്കാർക്കും ഒരുപോലെ ആസ്വദിക്കാൻ കഴിയുന്ന രീതിയിലാണ് ഖത്തർ കലണ്ടർ പരിപാടികൾ ക്രമീകരിച്ചിരിക്കുന്നത്.
കുട്ടികളുടെയും കുടുംബങ്ങളുടെയും പ്രധാന ആകർഷണമായ 'ഖത്തർ ടോയ് ഫെസ്റ്റിവൽ' ദോഹ എക്സിബിഷൻ ആൻഡ് കൺവെൻഷൻ സെന്ററിൽ (DECC) ആരംഭിച്ചു. ജൂലൈ 1 മുതൽ 31 വരെ നീണ്ടുനിൽക്കുന്ന മേളയിൽ കളിപ്പാട്ടങ്ങളുടെ വിപുലമായ ശേഖരമാണ് ഒരുക്കിയിട്ടുള്ളത്. ഇതിനോടനുബന്ധിച്ച് 4 മുതൽ 12 വയസ്സുവരെയുള്ള കുട്ടികൾക്കായി ജൂലൈ 5 മുതൽ 30 വരെ പ്രത്യേക സമ്മർ ക്യാമ്പും ഇവിടെയുണ്ടാകും. കുട്ടികളുടെ സർഗ്ഗാത്മകതയും അന്വേഷണ ബുദ്ധിയും വളർത്താൻ സഹായിക്കുന്ന വിനോദങ്ങളാണ് ഇതിൽ ഉൾപ്പെടുത്തിയിരിക്കുന്നത്.
​കൂടാതെ, കത്താറ കൾച്ചറൽ വില്ലേജിലെ കത്താറ ഹാളിൽ ജൂൺ 27-ന് ആരംഭിച്ച 'ഫാമിലി സമ്മർ ഷോപ്പിംഗ് എക്സിബിഷൻ 2026' ജൂലൈ 3 വരെ തുടരും. ഷോപ്പിംഗും വിനോദവും ഒരുമിച്ച് അനുഭവിക്കാൻ സാധിക്കുന്ന മികച്ചൊരു കേന്ദ്രമാണിത്.സാംസ്കാരിക-കലാ മേഖലകളിലും ജൂലൈ മാസം സമ്പന്നമാണ്. ഖത്തർ ഒളിമ്പിക് ആൻഡ് സ്പോർട്സ് മ്യൂസിയത്തിൽ (3-2-1) ജൂൺ 22-ന് ആരംഭിച്ച 'കൾച്ചറൽ ഒളിമ്പ്യാഡ് കോമ്പറ്റീഷൻ എക്സിബിഷൻ' ഓഗസ്റ്റ് 31 വരെ തുടരും. ആഗോള പ്രതിഭകളുടെ സർഗ്ഗാത്മകത വിളിച്ചോതുന്നതാണ് ഈ പ്രദർശനം. ഖത്തർ പ്രിപ്പറേറ്ററി സ്കൂളിലും നാഷണൽ മ്യൂസിയത്തിലും നടക്കുന്ന 'കൺട്രിസൈഡ്: എ പ്ലേസ് ടു ലിവ്, നോട്ട് ടു ലീവ്' എന്ന പ്രദർശനം സെപ്റ്റംബർ വരെ നീണ്ടുനിൽക്കും.
​വ്യാപാര മേഖലയിൽ, ദോഹ സമ്മർ ട്രേഡ് ഫെയറും അൽ ഹസം ഗലേറിയയിൽ നടക്കുന്ന പ്രശസ്തമായ 13-ാമത് 'തീബ് അൽ ഹസം ഊദ് ആൻഡ് പെർഫ്യൂംസ്' പ്രദർശനവും ജൂലൈ 4-ഓടെ സമാപിക്കും. ലോകത്തിലെ ഏറ്റവും മികച്ച സുഗന്ധദ്രവ്യ ബ്രാൻഡുകളാണ് അൽ ഹസമിൽ ഒരുക്കിയിരിക്കുന്നത്.